thumbnail

ពន្លកថ្មី

ពន្លក ពនិតា

យុវជនគ្រប់រូបតែងមានស្មារតីទំនួសខុសត្រូវចំពោះជីវិតរបស់ខ្លួន និងសង្គមដែលខ្លួនរស់នៅ។ ដើម្បីឱ្យសង្គមមួយមានការអភិវឌ្ឍរីកចម្រើន ទាមទារឱ្យយុវជនត្រូវយកចិត្តទុកដាក់ និងមានមនសិការនៅក្នុងខ្លួន។ យុវសិស្ស ពន្លក ពនិតា ជាសិស្សមួយរូបនៃសាលា AIS ថ្នាក់ទី១២ខ បានបញ្ចប់ការសិក្សានៅក្នុងឆ្នាំសិក្សា២០២២-២០២៣ ដោយទទួលបាននិទ្ទេស A នៅក្នុងការប្រឡង។ ក្រៅពីការសិក្សា គាត់បានចំណាយពេលវេលាចូលរួមចំណែកធ្វើការងារសង្គម ក៏ដូចជាបានចូលរួមក្នុងកិច្ចការងារសាលាដូចជា ចូលរួមក្នុងព្រឹត្តការណ៍ទិវាវប្បធម៌ ការលក់សប្បុរសធម៌ កម្មវិធីបើក-បិទបវេសនកាលសាលា មិនត្រឹមតែប៉ុណ្ណោះគាត់គឺជាប្រធានក្លឹបនៃក្លឹបគុណភាព និងវិន័យ ដែលស្ថិតនៅក្នុងក្រុមប្រឹក្សាសិស្សនៃសាលា AIS។ ទោះបីជាយ៉ាងណាក៏ដោយ ការសិក្សារបស់គាត់គឺគ្មានការធ្លាក់ចុះនោះឡើយ។ ខាងក្រោមនេះគឺជា បទពិសោធន៍ និងវិធីសាស្រ្តដែលជួយឱ្យគាត់ទទួលបានលទ្ធផលល្អ។

ចំពោះយុវសិស្ស ពន្លក ពនិតា គាត់បាននិយាយថា " មនុស្សម្នាក់ៗគឺសុទ្ធតែទទួលបាននូវពេលវេលាកំណត់២៤ម៉ោងដូចៗគ្នា ក្នុងមួយថ្ងៃ អ្វីដែលខុសគ្នានោះគឺការដែលបុគ្គលនីមួយៗ គ្រប់គ្រងនិងប្រើប្រាស់ពេលវេលាទាំងនោះ។ ដើម្បីឱ្យទទួលបានលទ្ធផលល្អ នោះគឺត្រូវចេះបែងចែងពេលវេលារបស់ខ្លួនឱ្យបានច្បាស់លាស់។ នៅក្នុងការសិក្សាក្នុងថ្នាក់ក្ដី ឬនៅផ្ទះក្ដី ត្រូវតែមានសម្មាធិនៅក្នុងខ្លួន ចេះបែងចែកម៉ោងរៀននិង ម៉ោងដែលខ្លួនទំនេរឱ្យបានច្បាស់លាស់ទើប ធ្វើឱ្យការសិក្សាមានការរីកចម្រើន។ ទន្ទឹមគ្នានេះដែរ ក្រៅពីការចេះគ្រប់គ្រងពេលវេលា ក៏ត្រូវចេះគ្រប់គ្រងខ្លួនឯង ដោយនៅក្នុងម៉ោងរៀនត្រូវតាំងចិត្តស្ដាប់គ្រូពន្យល់មេរៀន បញ្ចេញសកម្មភាពនៅក្នុងថ្នាក់ដូចជា ការកត់មេរៀន ធ្វើលំហាត់ សួរនិងឆ្លើយសំណួរដែលគ្រូបានសួរ។ ស្របគ្នានេះដែរ ក៏ត្រូវស្វ័យសិក្សាបន្ថែមដោយខ្លួនឯង ស្វែងរកចំណុចខ្លាំងនិងចំណុចខ្សោយរបស់ខ្លួនហើយខិតខំហ្វឹកហាត់ទៅលើចំណុចណាដែលខ្លួនខ្វះខាត។ លើសពីនេះទៅទៀត គាត់បានចំណាយពេលពន្យល់មេរៀននិងលំហាត់ទៅកាន់មិត្តភក្តិបន្ថែម។ ការធ្វើបែបនេះបានជួយទៅដល់ការពង្រឹងសមត្ថភាពក៏ដូចជាចំណេះដឹងរបស់គាត់"។ ចំពោះការងារសង្គម និងការងារសាលា គាត់បាននិយាយថា "ការដែលបានចូលរួមធ្វើនូវកិច្ចការទាំងអស់នេះ បានផ្ដល់នូវចំណេះដឹង និងបទពិសោធន៍ជាច្រើនដែលមិនមាននៅក្នុងមេរៀននោះទេ។ ការដែលទទួលបានូវលទ្ធផលល្អទាំនេះគឺមិនមែនជាភាពចៃដន្យនោះទេ គឺត្រូវលះបង់ទាំងកម្លាំងកាយ និងកម្លាំងចិត្តឱ្យអស់ពីសមត្ថភាពដែលខ្លួនមាន។ សម្រាប់ការដែលទទួលបាននូវនិទ្ទេសល្អក្នុងការសិក្សា​ យុវសិស្សបានបង្ហើបពីវិធីសាស្រ្តក្នុងការសិក្សាដូចជា ៖

  • រៀបចំកាលវិភាគសិក្សាឱ្យបានសមស្របនឹងខ្លួនឯង 
  • ត្រូវខិតខំយល់ពីអត្ថន័យនៃមេរៀន បើមានចំណុចណាដែលមិនច្បាស់​ ត្រូវហ៊ានសួរគ្រូ និងស្រាវជ្រាវស្វែងយល់បន្ថែមដោយខ្លួនឯង
  • ចំណាយពេលវេលាធ្វើលំហាត់ឱ្យបានច្រើនជាប្រចាំតាមលទ្ធភាពរបស់ខ្លួន
  • មករៀនឱ្យបានទៀងទាត់ និងស្ដាប់គ្រូពន្យល់មេរៀន
  • ថែរក្សាសុខភាពរបស់ខ្លួនឱ្យបានល្អ ដោយបរិភោគអាហារដែលមានជីវជាតិ សម្រាកឱ្យបានគ្រប់គ្រាន់ និងធ្វើលំហាត់ប្រាណ

មនុស្សគ្រប់រូបគឺមានបំណងប្រាថ្នារួមមួយគឺ អភិវឌ្ឍខ្លួនឯង គ្រួសារ និងសង្គមឱ្យកាន់តែល្អប្រសើរ ហើយដើម្បីទទួលបាននូវសមិទ្ធផលទាំងនោះគឺត្រូវប្រឹងប្រែង ខ្នះខ្នែងដោយមិនខ្លាចភាពនឿយហត់ ទោះបីដឹងថាមានឧបសគ្គច្រើនយ៉ាងណាក៏ដោយ ក៏មិនចុះចាញ់ពិតប្រាកដមែន។ ដូចជាយុវនារីខាងលើ ដែលជាទំពាំងមួយរូបដែលកំពុងដុះលូតលាស់ស្នងប្ញស្សី។